Os visitantes que se acheguen ata o Pabellón de Galicia entre o 25 e o 31 de agosto poderán ver nun vídeo elaborado con motivo do certame diversas actuacións da Administración pesqueira galega como as repoboacións de especies no litoral ou a creación de reservas mariñas protexidas
A Consellería de Pesca difunde a súa aposta pola sustentabilidade do medio mariño na Expo Zaragoza 2008
A Consellería de Pesca e Asuntos Marítimos difundirá entre os días 25 e 31 de agosto a súa aposta pola sustentabilidade do medio mariño no Pavillón de Galicia da Expo Zaragoza 2008, a través da proxección dun vídeo elaborado con motivo do certame e no que se incide na importancia de actuacións como a creación de áreas mariñas protexidas, as repoboacións do litoral ou a protección do medio ambiente.
O vídeo, que ten unha duración de dous minutos e vinte segundos, comeza co lema Auga-Mar-Galicia, achegándose, deste xeito, ao obxecto da mostra internacional, a auga como elemento para a vida. As imaxes, que son emitidas cun texto sobreimpreso, organízanse en torno a catro eixos que lles dan continuidade: Reservas Mariñas, Repoboación, Medio Ambiente e Sustentabilidade.
Tamén é de sinalar que a proxección amosará aos visitantes que se acheguen ao Pavillón de Galicia durante a vindeira semana, as nosas costas e os fondos mariños coas especies que os habitan, así como actividades vencelladas ao mundo do mar características da nosa comunidade autónoma, como o marisqueo ou a pesca con diferentes artes.
En canto ás reservas mariñas, faise fincapé na importancia de protexer o hábitat fomentando o desenvolvemento das especies para asegurar o futuro. Nesta liña atópase a Reserva Mariña de Interese Pesqueiro “Os Miñarzos” de Lira, que foi creada trala aprobación, polo Consello da Xunta de Galicia, do correspondente Decreto o 12 de abril de 2007. Este espazo marítimo protexido atópase no concello coruñés de Carnota e foi impulsado conxuntamente pola Consellería de Pesca e a Confraría de Pescadores de Lira.
Coa creación desta reserva mariña, a primeira deste tipo posta en marcha en Galicia, buscouse, entre outros obxectivos, favorecer a rexeneración dos recursos pesqueiros, conservar a flora e a fauna do medio mariño e a súa diversidade, fomentar a sensibilización ambiental sobre o mar, divulgar os valores pesqueiros e ambientais da costa galega e favorecer os estudos científicos sobre as medidas de protección dos recursos e xestión das pesqueiras. Ademais, a creación desta área protexida busca aportar novasoportunidades socio económicas no campo do turismo e do lecer que favorezan a diversificación das actividades da comunidade pesqueira e a posta en valor dos pescadores e da cultura mariñeira.
Ao apartado relativo ás reservas mariñas séguelle outro no que se aposta polo crecemento sostible, a defensa dos recursos mariños e o medio natural e a repoboación no mar para “crear máis vida na vida”. De feito, unha das principais iniciativas do equipo da Consellería de Pesca é o Plan de Repoboación de Especies Mariñas no Litoral Galego, posto en marcha a finais de 2005 e que, ao remate de 2008, permitirá acadar a cifra de 11.000 xuvenís de lumbrigante e 34.000 alevíns de rodaballo liberados nas costas galegas.
Por outra banda, o vídeo que Pesca difundirá na Expo Zaragoza 2008 tamén recolle a importancia do medio ambiente e, concretamente, a de coidar o mar para poder vivir del, así como o papel da sustentabilidade, eido no que se avoga por aproveitar os recursos e respectar o entorno para que Galicia “siga sendo un paraíso mariño de riqueza e biodiversidade”. Nesta dirección, hai que destacar que unha das mellores medidas aplicadas para lograr os fins referidos anteriormente é o Plan Xeral de Explotación Marisqueira, un documento que se elabora anualmente e que constitúe un mecanismo que permite ao sector participar de forma activa na responsabilidade da xestión dos recursos mariños.
